🩸 ખેરગામ તાલુકાના તોરણવેરા PHC ખાતે રક્તદાન કેમ્પ યોજાયો.

ગ્રામજનો, યુવાનો અને શિક્ષકોએ ઉત્સાહપૂર્વક રક્તદાન કરી માનવસેવાનો સંદેશ આપ્યો

તોરણવેરા: તોરણવેરા પ્રાથમિક આરોગ્ય કેન્દ્ર (PHC) ખાતે PHC પરિવાર અને ગ્રામજનોના સહયોગથી ભવ્ય રક્તદાન કેમ્પનું આયોજન કરવામાં આવ્યું હતું. “રક્તદાન કરો, કોઈનું જીવન બચાવો”ના સંદેશ સાથે યોજાયેલા આ કેમ્પમાં ગ્રામજનો, યુવાનો તેમજ પ્રાથમિક શાળાના શિક્ષકોએ ઉત્સાહપૂર્વક રક્તદાન કરી માનવસેવાનું ઉત્તમ ઉદાહરણ પૂરું પાડ્યું હતું.

કેમ્પ દરમિયાન કુલ 16 બેગ રક્ત એકત્ર કરવામાં આવ્યું હતું. આ પ્રસંગે સરપંચશ્રી સુનિલભાઈ ડાભડીયા, ખેરગામ THO ડૉ. પ્રગ્નેશ દેસાઈ, તાલુકા પંચાયત સભ્યશ્રી શિલ્પાબેન ભાવેશકુમાર વાઢુ, માજી તાલુકા પંચાયત ઉપપ્રમુખશ્રી ગમનભાઈ હુડકિયા, ગ્રામ પંચાયત સભ્યશ્રી ભાવેશ વાઢુ તેમજ પ્રાથમિક શાળાના આચાર્યશ્રી હેમાંગ ટંડેલ સહિત ગામના આગેવાનો અને મહાનુભાવો ઉપસ્થિત રહ્યા હતા.

રક્તદાન કેમ્પના આયોજન અને વ્યવસ્થામાં તોરણવેરા PHCના મેડિકલ ઓફિસર ડૉ. પાર્થ પટેલ, આરોગ્ય કાર્યકર રાકેશભાઈ પટેલ, PHC સુપરવાઇઝર અલ્કેશભાઈ સહિત સમગ્ર આરોગ્ય કર્મચારી ટીમે મહત્વપૂર્ણ ભૂમિકા ભજવી હતી.

કેમ્પ દરમિયાન શ્રીમદ્ રાજચંદ્ર હોસ્પિટલની બ્લડ બેન્કની ટીમ દ્વારા રક્તદાતાઓની જરૂરી તબીબી તપાસ, માર્ગદર્શન તેમજ નિયમો મુજબ રક્તસંગ્રહની કામગીરી કરવામાં આવી હતી. તેમના સહયોગથી કેમ્પ સફળતાપૂર્વક યોજાયો હતો.

રક્તદાન કરનાર તમામ રક્તદાતાઓને પ્રોત્સાહનરૂપે ટિફિન બોક્સ ભેટ આપવામાં આવ્યા હતા અને તેમના અમૂલ્ય યોગદાન બદલ સન્માન કરી આભાર વ્યક્ત કરવામાં આવ્યો હતો.

આ પ્રસંગે ઉપસ્થિત મહાનુભાવોએ જણાવ્યું હતું કે “રક્તદાન એ મહાદાન છે.” જરૂરિયાતમંદ દર્દીઓ માટે કરવામાં આવેલું રક્તદાન જીવન બચાવવામાં મહત્વપૂર્ણ બની શકે છે. ગ્રામજનો, યુવાનો અને પ્રાથમિક શાળાના શિક્ષકો દ્વારા કરવામાં આવેલા રક્તદાનથી સમાજમાં માનવસેવા અને સામાજિક જવાબદારીનો સુંદર સંદેશ પહોંચ્યો હતો.

કેમ્પની સફળતા બદલ તોરણવેરા PHC પરિવાર, શ્રીમદ્ રાજચંદ્ર હોસ્પિટલની બ્લડ બેન્ક ટીમ, પ્રાથમિક શાળા પરિવાર, તમામ રક્તદાતાઓ તથા સમગ્ર ગ્રામજનોનો હૃદયપૂર્વક આભાર વ્યક્ત કરવામાં આવ્યો હતો. સાથે જ વધુમાં વધુ લોકો સ્વૈચ્છિક રક્તદાન માટે આગળ આવે તેવો સંદેશ આપવામાં આવ્યો હતો.